Ja Gumhpraw hte Ningbaw Ningla (Money and Leader)

        Hkungga Nuwa hpuanu ni hpang de, Ja gumhpraw hte Ningbaw Ningla ngu ai ginlam hte seng nna, mu hti hkaja la lu ai made mi hpe gam garan ya dat lu nngai.

Nuwa hpunau ni, Ja gumhpraw ngu ai gaw, ya daini na ten hta, ja gumhpraw nnga jang hpa nan nmai galaw ai prat rai sai. Anhte nam ga hkan nga yang, Ja gumhpraw nlu tim, asak mai hkrung ai, ndai layang ga, myu ga hkan nga jang, nta kaw na lagaw lahkap htawt ai hte ja gumhpraw hpe makrai hkrai nna she hkawmsa ra ai rai nga ai. Dai rai yang, ja gumhpraw a majaw, daini na ten, jet ai ningbaw ningla ni law law wa, dai Ja gumhpraw a hpang de hkrai hkat shachyut taw nga masai. Anhte na ga na re, gumhpraw, gumhpraw mu jang myi gaw le le nga ai hpa….wuhpung wuhpung hkan na ningbaw ningla ni, mungdan a ningbaw ningla ni hte nawku hpung a ningbaw ningla ni nkau mi du hkra, dai ja gumhpraw a hkalem ai maga de yawng shanang mat wa nna, tinang lit ang ai wuhpung wuhpawng a lit magam hta hprai wa ai, nawku hpung a ningbaw ningla ni mung, nawku hpung masha ni hpe woi awn hkawmsa ai lam hta n gun yawm mat wa ai sai rai nga ai.

Money and Leader

Nuwa ni, ya daini wuhpung wuhpawng nkau mi hkan na, ningbaw ningla ni kaning rai nna, Gumhpraw a hpang hkan taw ai kun? nga yang. Tinang a wuhpung wuhpawng a matu nga nna, ga baw jaw da ai raitim, dai ja gumhpraw ni gaw, hpang jahtum tinang a tingkyeng ja gumhpraw ni tai mat wa ai, tinang a sumbu de sha yawng shang mat wa ai, lawu na ma ni, wuhpung wuhpawng shang masha ni gaw, mu tim, chye tim, n gwi tsun, n gup mahka nna, yu mau tsap taw na lam sha rai mat sai. Dai zawn re ai lam ni, yay anhte a mungdan, atsuya magam gam nkau mi hkan mung, mu lu na re. Ndai lam gaw, ja gumhpraw hpe e, shani shana myit taw ai, lu mayu ai hta grau lu mayu wa ai, sahte ai hta grau sahte mayu wa ai, ja gumhpraw a hpang de chyu hkan mayu wa ai majaw, byin wa ai lam ni rai nga ai. Dai majaw, wuhpung wuhpawng a ningbaw ningla ni gaw, ja gumhpraw hpe tinang lu la ang ai, tinang a matu shata shabri shabrai htan lai jan nna, ladu lai myit marin ai lam ni nmai ai. Hpang jahtum tinang du hkra, Gumhpraw a mayam tai mat nna, Wuhpung wuhpawng hpe woi awn ai jet ai ningbaw ningla prat kaw nna, Ja gumhpraw e woi awn ai npu na, masha she tai mat wa na rai nga ai.  

       Bai nna, mungdan a ningbaw ningla nkau mi a masa hpe mung bai maram yu ga nga yang, mung shawa gaw sharawt masing, mung shawa ni a matu, nga nna, mana maka ga baw shalaw, kaja wa ta tut hta gaw, masan nsa ai sha n-ga, hpang jahtum dai magam bungli ni galaw na matu ja gumhpraw ngu sawn da ai ni yawng, tinang a ting kyeng a matu she rai mat wa ai. Anhte ya ta tut hta mung, du gyi slg. ni a nta hte hpyen ma ni a nta ni, kade ram madang shai taw ai hpe myi chyaw mu lu na ga ai re. Dai ngu yang, Mungdan a ningbaw ningla ni yawng ngu na, Ja gumhpraw a hpang hkan nang ai ngu nna, tsun mayu ai nrai, nkau ningbaw ningla ni a n kaja ai kyang lai len hpe madi madun mayu ai she rai nga ai. Dai lam ni gaw, ya gam garan ya nga ai, Ja gumhpraw a mahkam hta na nlawt lu mat ai hte, tinang hkum nan, mungdan a magam gun re ngu ai hpe pyi malap mat wa shangun lu nga ai re. Dai majaw, anhte a mungdaw mungdan gaw gap ai lam ni hta, ja gumhpraw ni law law ra nga ai, raitim, dai ja gumhpaw ni hpe, kaja wa sha nan, mungdan gaw sharawt ai lam ni hta jai lang ai rai yang chyu sha, dai Ja gumhpraw a mai kaja ai akyu hpe hkamla lu na, nchye jai lang jang gaw, ja gumhpraw a mayan, she rai mat na, mungdan a ningbaw ningla ngu ai mying sha she gun taw mat na rai nga ai.

            Bai ya hpang jahtum daw hta matut gam garan ya mayu ai gaw, nawku hpung a ningbaw ningla ni nkau mi du hkra, ndai Ja gmhpraw a mayam tai wa ai lam re. (Luka 9: 3) hta, Yesu, shi a Sape ni hpe shangun dat ai shaloi, “Hkrun lam na matu dawhkrawng, htingpa, muk, gumhpraw re ai hpa mung hkum gun hkum lang myit; palawng lahkawng mung hkum gun myit…” ngu ai Madu Yesu a shatsam da ai mungga hpe lale kau wa ai masa ni, anhte a makau grup yin hkan grai mu lu wa nga sai re. Nawku hpung a lit magam ni hta, myit lawm hkum lawm let shakut shaja taw ai, nawku hpung masha ni hpe e, atsawm akawm rai nna woi awn taw nga ai hpung woi langai mi a matu, hpa myit tsang shara nnga ai, daini na ten hta, hpung masha ni mung, myi hpaw na na ai ni grai law wa sai re. Dik shale, anhte a hpung woi, kajawng kaja machyi wa sai da (sh)  grai yak hkak taw wa sai ngu ga, hpung masha ni, dai hku nna n yu shalai kau na re. Hpung woi Sara wa hpang de du hkra sit sa na mara ai. Mi sha anhte, na la lai wa sai kabu gara shiga hta, Madu Yesu, tsun shadum ai gaw, dai lam hpe madi madun ai lam re. Tinang a saguhpung masha ni hpe atsawm sha woi awn ai wa a matu, Karai Kasang Wa shi jaw ya na chyeju kumhpa nga ai lam, shawng lam a matu hpa ntsang ra ai lam hpe hkam daga tsun shadum da ai lam rai nga ai. Ndai Madu a mungga hpe, hprai lamai rai nna, tinang a saguhpung masha ni a nsen mung nna mat, ja gumhpraw e shaga la ai nsen hpe sha madat re ai ni, hpang jahtum Karai Kasang a shaga nsen mung nna mat ai sha n-ga, ja gumhpraw a mayan, ja gumhpraw e woi awn ai npu hta hkan nang taw ra ai ni, lani hte lani grau grau she law wa nga sai. Ndai lam ni gaw, saguhpung masha ni a matu yawn hpa tai wa ai zawn, kaja wa sha nan, nawku hpung hpe woi awn nga ai ningbaw ningla ni a matu mung, yawn hpa kaba tai wa chyalu rai nga ai. Karai Kasang wa a shaga ai nsen, Madu Yesu a shaga ai nsen hpe, Ja gumhpraw e shaga la ai nsen hte galai kau ai rai yang, ya ndai sak hkrung nga ai ten, ngwi pyaw lam lu tim, htawm hpang prat a ngwi pyaw simsa lam hpe gaw lu la na nrai nga ai hpe, ya daini ta tut, ja gumhpraw a mayan tai nga ai, nawku hpung a hpung woi nkau mi myit dum hprang na aten du nga sai re.

          Hkungga tsawra ai Nuwa hpunau ni, lahta de gam garan lai wa sai hte maren, ja gumhpraw hpe atsawm sha jai lang akyu jashawn let, ya ta tut hta ningbaw lit hpe woi awn nga ai ni mi rai rai, hpotni hpotna ningbaw lit hpe lahpa galai la na ni rai rai, Ja gumhpraw a mayan ntai hkrup hkra sadi ga, ja gumhpraw a shaga ai nsen hpe chyu n madat ga ngu nna, mu hti hka ja la lu ai hpe matut nna, gam garan ya dat lu nngai.