2017, September Shata Praw (04) Ya Shani a Matu, Madu a Kabu Gara Shiga

(Luka 4: 16-30)

 

Shaloi, shi nga kaba wa ai Nazaret mare de du wa ai; shi a htung hte maren laban nhtoi e dai tara jawng hta shi shang wa ai rai nna, laika hti na rawt wu ai. Shaloi myihtoi Esaia a laika shi hpe jaw wu ai rai nna, dai laika hpaw yang, ning nga ka da ai shara mu hkrup wu ai; Madu a Wenyi nye a ntsa e nga nga ai: Matsan mayan ni hpe kabu gara shiga hkaw tsun na matu, shi ngai hpe naman chya ni ai: Bawng dung ai ni hpe shalawt lu na lam, Myi kyaw ai ni hpe myi bai mu na lam, hkaw tsun na matu mung, Zingri zingrat hkrum ai ni hpe dat dat shangun na hte, Madu a sharawng awng ai shaning hkaw tsun dan na matu mung, shi ngai hpe shangun dat ni ai, nga ai. Dai laika katsu nna, tara jawng sin ai wa hpe bai ya kau nhtawm, shi dung nga ai: tara jawng na ni nlang hte gaw shi hpe azi yu nga ma ai.  Shi gaw, Ndai ka da ai ga gaw daini nan nanhte a na hta dik mat sai, ngu nna shanhte hpe ga tsun hpaw wu ai. Nlang hte gaw shi a lam sakse hkam ya ai hte, shi a n-gup hta na pru ai chyeju ga majaw mau nga nna, Ndai wa gaw Yosep a kasha n rai nga a ni? nga nna tsun shajang ma ai. Dai rai nna shi gaw, Nanhte kaja wa teng teng, Tsi sara e, tinang hkum dai shamai la u; anhte na ai hte maren, Kaperna-um mare e shabyin ai amu zawn, nang na a buga e mung galaw dan u, nga nna ga shadawn ndai hte ngai hpe tsun na marin dai. Bai shi gaw, Nanhte hpe ngai teng teng tsun made ga, Kadai myihtoi mung tinang buga e arawng n lu ga ai. Bai nanhte hpe ngai kaja wa tsun made ga, Elia a aprat e, masum ning e shata kru tup jan gri nna, dai mung ting hkan e nachying hku hku hpang gara rai wa yang, Israela a amyu hta gaida law law nga ma ai: rai timung, shanhte hta na langai mi kaw mung Elia hpe n shangun dat wu ai; Sidun mung Zarephta mare na gaida jan langai mi kaw she shangun dat wu ai. Myihtoi Elisha a aprat e mung, Israela a amyu hta manggang kap ai masha law law wa nga ma ai, rai timung, shanhte hta na langai mi muk san pra wa lu ai n rai; Suri masha Naman ngu ai wa chyu sha san pra wa lu ai, ngu mu ai. Dai tara jawng na ni nlang hte gaw dai lam na jang, ja ja masin pawt bu ai hte, gan rawt nna, mare shinggan de shi hpe shapraw nhtawm, shanhte a mare de ai bum pungding na hkin-gau mahka kaw nna, shi hpe kanawng jahkrat kau na woi sa wa mu ai. Shi chyawm gaw shanhte a ka-ang hku ga pru nna sa mat wa ai.

(Luke 4: 16-30)

Jesus came to Nazareth, where he had grown up, and went according to his custom into the synagogue on the sabbath day. He stood up to read and was handed a scroll of the prophet Isaiah. He unrolled the scroll and found the passage where it was written: The Spirit of the Lord is upon me, because he has anointed me to bring glad tidings to the poor. He has sent me to proclaim liberty to captives and recovery of sight to the blind, to let the oppressed go free, and to proclaim a year acceptable to the Lord. Rolling up the scroll, he handed it back to the attendant and sat down, and the eyes of all in the synagogue looked intently at him. He said to them, "Today this Scripture passage is fulfilled in your hearing." And all spoke highly of him and were amazed at the gracious words that came from his mouth. They also asked, "Is this not the son of Joseph?" He said to them, "Surely you will quote me this proverb, 'Physician, cure yourself,' and say, 'Do here in your native place the things that we heard were done in Capernaum.' And he said, "Amen, I say to you, no prophet is accepted in his own native place. Indeed, I tell you, there were many widows in Israel in the days of Elijah when the sky was closed for three and a half years and a severe famine spread over the entire land. It was to none of these that Elijah was sent, but only to a widow in Zarephath in the land of Sidon. Again, there were many lepers in Israel during the time of Elisha the prophet; yet not one of them was cleansed, but only Naaman the Syrian." When the people in the synagogue heard this, they were all filled with fury. They rose up, drove him out of the town, and led him to the brow of the hill on which their town had been built, to hurl him down headlong. But he passed through the midst of them and went away.

September 03, 2017 - Pranwan Ladaw Laban (22) Hta Hti Ang ai Ja Chyum Mungga ni

Chyum Mungga Daw (1)        Yeremia 20:7-10

Ya hti na gaw, Myihtoi Yeremia a Laika hta na rai nga ai.

Madu e, nang ngai hpe shagwi nna ngai hkam la sai. Nang n-gun ja grau nna dang nit dai. Ngai shani shanang asawng asang hkrum ai. Nlang hte ngai hpe roi la ma ai. Ngai ga tsun shagu shabam nngai. Kashun kashe, hten bya hkrai lam, ngu jahtau tsun nngai. Madu a mungga a majaw ngai hta, shatan nhkan hte jahpoi shara shani shagu tai nga ai. Madu hta hpa nna, shi a mungga n tsun sana, ngu tim, nye myit kraw hta wan zawn hkru nna, nye nrut nra ni hta grung nga ai majaw, nye a myit kadau kadap nna n sharang lu nngai. Masha ni a shatan n hkan ngai na lu nngai.

Shoihpa shoirang shara magup rai nga ai. Nye a makyin jinghku ni pyi, mara shagun mu. Anhte shi hpe mara shagun na ga ai. Anhte shi hpe lau lu nna, dang kau lu na nhten. Shi hpe matai dawp lu na nhten, nga nna ngai hpe gyam yu ai ni tsun ma ai.

Ya hti ai gaw, Karai Kasang a mungga rai nga ai.

Chyum Mungga Daw (2)    Roma 12:1-2

Ya hti na gaw, Roma ni kaw San Pawlu shagun dat ai laika hta na rai nga ai.

Hpu nau ni e, anhte hpe Karai Kasang matsan dum ai lam kaba la nga ai. Ngai nanhte hpe shadum nngai. Nanhte a hkum hpe chyoi pra hkrung nga ai hkungga di nna, Karai Kasang kaw nawng ya nga mu. Shi hta sharawng awng ai ni tai nna myit jung let daw jau nga mu. Dai gaw nanhte jaw mai ai tengman ai nawku daw jau lam rai nga ai. Mungkan jasat madang hpe nanhte hkum myit hkan myit. Karai Kasang hpe nanhte a myit masin tup hkren galai kau ya shangun mu. Shaloi Karai Kasang myit ra ai lam hpe chye lu na myit dai. Mai kaja lam gara re ai; Madu ra sharawng ai lam hte kup tsup lam hpe ginhka la lu na myit dai.

Ya hti ai gaw, Karai Kasang a mungga rai nga ai.

Kabu Gara Shiga        Mahte 16:21- 27

Ya hti na gaw, Mahte a Laika hta na Madu a Kabu Gara Shiga rai nga ai. 

Yesu Hkristu gaw, Yerusalem mare sa lu na, agyi salang ni, jau agyi ni hte laika ka sara ni a lata hta e nni nkri law law hkrum nna, sat kau hkam nhtawm, masum ya nhtoi hta e, bai hkrung rawt na lam, sape ni hpe madun dan hpang wu ai. Petru gaw, shi hpe shaga la nna, Madu e, dai nang hta n byin u ga, Dai nang hpe galoi n hkan hkra lu na rai, nga nna jet nga ai. Shi Petru hpang gayin nna, satan e, nye a hpang de sit mat wa u. Karai Kasang hte seng ai lam n rai, masha hte seng ai lam hpe sha myit nga ndai. Nye a matu myit kataw shara nang rai nga ndai, ngu wu ai. Yesu shi a sape ni hpe, Ngai hpang de sa mayu ai wa kadai mung, tinang hkum hpe nyet kau na rai nna, tinang udang hpai let, ngai kaw hkan nang ru ga. Tinang asak hkye mayu ai wa kadai mung, dai sum mat lu na re. Nye a jaw e tinang asak sum kau ai wa chyawm gaw dai hpe mu lu na ra ai. Masha gaw nga yawng nga pra kawm dawm amyat lu la ninglen, tinang asak sum mat yang gaw, shi a matu hpa akyu nga lu ta? Masha gaw hpa gawng malai hkungga hte wa, tinang a asak hpe shaw la lu na a ta? Dai masha kasha gaw, Kawa a hpung shingkang hte shi a lamu kasa ni hte nawng du na ra ai. Dai shaloi tinang galaw ai hte maren, langai the langai hpe bai htang na ra ai.

Ya hti ai gaw, Madu a Kabu Gara Shiga rai nga ai.

2017, September Shata Praw (02) Ya Shani a Matu, Madu a Kabu Gara Shiga

(Mahte 25: 14-30)

Yesu shi a sape ni hpe ga shadawn tsun mu ai gaw, lang mi na masha langai mi bu hkawm na maw ai rai nna, mayam ni hpe shaga la nhtawm, shi a arai ni shanhte hpe ap ya da mu ai: langai mi hpe gumhpraw joi manga, langai mi hpe lahkawng, langai mi hpe joi mi di nna, langai hte langai hpe tinang a atsam hte maren ap ya da nhtawm e, hkawm sa mat wa ai. Shaloi jang gumhpraw joi manga lu la ai wa gaw pru sa nna, dai hte hpaga ga wu yang, kaga gumhpraw joi manga myat la nu ai. Lahkawng lu la ai wa mung dai hte maren ga nna, lahkawng myat la nu ai. Joi mi arang ai wa mahtang pru sa nhtawm, nhkun htu nna, shi a madu a gumhpraw hpe lup da wu ai. Ya tawng marang na wa jang, dai mayam ni a madu bai wa nna, shanhte hpe ga jahpan la mu ai. Gumhpraw joi manga arang ai wa gaw, kaga joi manga lang let, sa du nna, Madu e, gumhpraw joi manga nang ngai hpe arang shapraw ya da ndai; yu u, kaga joi manga ngai myat la lu nngai, ngu wu ai. Dai rai nna shi a madu, Ara, kaja ai hte sadi dung ai mayam e: arai loi sha hta nang kangka rai nit dai; arai law law a ntsa e ngai nang hpe san tawn da na de ai: na madu a kabu gara ai hta shang lawm u, ngu nna shi hpe tsun wu ai. Gumhpraw joi lahkawng lu ai wa mung sa du nna, Madu e, joi lahkawng nang ngai hpe ap da ndai; yu u, kaga joi lahkawng ngai myat la lu nngai, ngu wu ai. Dai rai nna shi a madu gaw, Ara, kaja ai hte sadi dung ai mayam e: arai loi sha hta nang kangka rai nit dai: arai law law a ntsa e ngai nang hpe san tawn da na de ai: na a madu a kabu gara ai hta nang shang law mu, ngu nna shi hpe tsun wu ai. Joi mi arang ai wa chyawm gaw sa du nna, Madu e, maji la ai wa nang rai nga ndai hte, nang n gat ai shara na nang dan la nna, nang n ayai ai shara na nang magawn la ndai hpe ngai chye nga nngai: dai rai nna hkrit ai hte ngai sa nna, na a gumhpraw hpe ga hta e lup da se ai: yu u, na a arai naw nga nga lit dai, ngu wu ai. Shi a madu gaw, N hkru ai hte lagawn ai mayam e: n gat ai shara na ngai dan la ai hte, n ayai ai shara na ngai magawn la ai hpe nang chye nga ndai: dai majaw nye a gumhpraw hpe boi ai shara hta nang tawn da lu na rai ndai; ngai bai wa yang she, nye a arang hte atu hpe bai la lu na we ai. Dai rai nna shi a gumhpraw joi hpe la kau nna, joi shi lu ai wa hpe jaw mu: lu ai wa kadai hpe mung, naw jaw nna shi law htam wa na ra ai: n lu ai wa kaw na chyawm gaw, shi lu malu hpe pyi naw shaw la na ru ai. Dai n hkaw ai mayam hpe gaw shinggan na nsin sin ai de shaden kau mu: dai shara e hkrap ngu hkrap ngoi ai hte wa udik ai rai na ra ai, ngu nna jeyang nu ai.

(Matthew 25: 13-30)

Jesus told his disciples this parable: "A man going on a journey called in his servants and entrusted his possessions to them. To one he gave five talents; to another, two; to a third, one – to each according to his ability. Then he went away. Immediately the one who received five talents went and traded with them, and made another five. Likewise, the one who received two made another two. But the man who received one went off and dug a hole in the ground and buried his master's money. After a long time, the master of those servants came back and settled accounts with them. The one who had received five talents came forward bringing the additional five. He said, 'Master, you gave me five talents. See, I have made five more.' His master said to him, 'Well done, my good and faithful servant. Since you were faithful in small matters, I will give you great responsibilities. Come, share your master's joy.' Then the one who had received two talents also came forward and said, 'Master, you gave me two talents. See, I have made two more.' His master said to him, 'Well done, my good and faithful servant. Since you were faithful in small matters, I will give you great responsibilities. Come, share your master's joy.' Then the one who had received the one talent came forward and said, 'Master, I knew you were a demanding person, harvesting where you did not plant and gathering where you did not scatter; so out of fear I went off and buried your talent in the ground. Here it is back.' His master said to him in reply, 'You wicked, lazy servant! So, you knew that I harvest where I did not plant and gather where I did not scatter? Should you not then have put my money in the bank so that I could have got it back with interest on my return? Now then! Take the talent from him and give it to the one with ten. For to everyone who has, more will be given and he will grow rich; but from the one who has not, even what he has will be taken away. And throw this useless servant into the darkness outside, where there will be wailing and grinding of teeth."

2017, September Shata Praw (01) Ya Shani a Matu, Madu a Kabu Gara Shiga

(Mahte 25: 1-13)

Yesu, shi a kasa ni hpe ndai ga shadawn tsun mu ai gaw, dai shaloi e sumsing lamu a mungdan gaw, tinang a pyengdin lang nna, la nnan hpe hkap bawp la na pru sa wa ai mahkawn shi hte bung na ra ai. Shanhte hta na manga gaw myit n su ma ai; manga mahtang gaw, myit su nga ma ai. Kaning rai nme law, myit n su ai ni shanhte a pyengdin lang ma yang tinang a matu sau n lang ma ai: myit su ai ni mahtang, tinang a pyengdin hte rau, tau ni hta, sau mung lang nga ma ai. Ya la nnan gaw naw la nga ai majaw, shanhte nlang yup shamawi rai nna yup pyaw nga ma ai. Yup tung hpawa e chyawm gaw, Yu mu, la nnan wa du ra ai! shi hpe hkap bawp la na pru mu, nga nna garu nga ai. Shaloi jang dai mahkawn ni nlang rawt nna, tinang a pyengdin hpe lajang ma ai. Myit n su ai ni mahtang, Anhte a pyengdin si mat wa ai majaw, nanhte a sau hta na garan jaw mi, ngu nna myit su ai ni hpe hpyi mu ai. Myit su ai ni mahtang htan nna, Anhte hte nanhte a matu n law dam nhten: dut ai ni kaw sa nna, nanhte a matu mari la na grau mai ai, ngu mu ai. Shanhte mari la na sa wa ai laman e, la nnan sa du wa ai hte, chyip chyip rai nga ai ni gaw, hkungran ai poi de shi hte rau shang lu ma ai rai nna, dai chyinghka la nga la ai. Dai hpang mahkawn kaga ni mung du nna, Madu e, Madu e, anhte hpe hpaw la mi, ngu nna hpyi mu ai. Shi mahtang htan nna, Nanhte hpe ngai teng teng tsun made ga, ngai nanhte hpe n chye made ai, ngu wu ai. Dai rai nna, dai shani rai timung, dai ahkying rai timung, nanhte n chye myit dai majaw, a maja nga mu. 

(Matthew 25: 1-13)

Jesus told his disciples this parable: "The Kingdom of heaven will be like ten virgins who took their lamps and went out to meet the bridegroom. Five of them were foolish and five were wise. The foolish ones, when taking their lamps, brought no oil with them, but the wise brought flasks of oil with their lamps.  Since the bridegroom was long delayed, they all became drowsy and fell asleep. At midnight, there was a cry, 'Behold, the bridegroom! Come out to meet him!' Then all those virgins got up and trimmed their lamps. The foolish ones said to the wise, 'Give us some of your oil, for our lamps are going out.'  But the wise ones replied, 'No, for there may not be enough for us and you. Go instead to the merchants and buy some for yourselves.'  While they went off to buy it, the bridegroom came and those who were ready went into the wedding feast with him. Then the door was locked. Afterwards the other virgins came and said, 'Lord, Lord, open the door for us!' But he said in reply, 'Amen, I say to you, I do not know you.' Therefore, stay awake, for you know neither the day nor the hour."